上次講起1911年,比利時飛行家溫德邦(Charles Van den Born)嚟到香港成功完成首次飛行,話說佢之後轉去廣州,繼續遠東「飛行之旅」,但相信佢都估唔到,喺廣州嘅飛行活動竟然會變成革命黨人刺殺官員嘅機會?

响當年4月8日嘅朝早,溫德邦喺廣州燕塘新軍嘅軍營操場內試飛,活動吸引咗幾千名觀眾到場,出席嘉賓包括滿洲副都統兼署廣州將軍孚琦。呢日嘅天氣同之前溫德邦喺香港試飛一樣咁唔穩定,在場人士等咗3個鐘,溫德邦先至可以試飛。溫德邦首次試飛只係飛咗幾尺,去到下晝1點佢再次試飛,點知喺降落嗰陣,飛機失控導致左邊機身受損。

活動完結之後,孚琦坐轎離開會場,喺經過廣州諮議局門外嘅時候,有個身穿藍色衫嘅革命黨人突然上前,向孚琦開咗3槍,孚琦當場死亡。署理兩廣總督張鳴岐認為革命黨計劃發難,於是加強城內新軍嘅部署。事件引起軒然大波,溫德邦受到輿論指摘,喺比利時領事同廣州當局勸告之下,溫德邦離開廣州,經香港返回歐洲,結束遠東之行。

圖為溫德邦廣州飛行,取自網絡。