之前提過，中國近代民主革命家宋教仁1913年領導國民黨贏出第一屆國會選舉，喺3月20日遭到槍擊、2日之後離世。宋教仁一直提倡政黨政治，並由責任內閣制約總統權力，結果激嬲咗當時係臨時大總統嘅袁世凱。雖然宋教仁案件最後無疾而終，但當時有唔少證據矛頭都指向袁世凱，令袁世凱受到輿論譴責。事件最終引發「二次革命」，但袁世凱唔使幾個月就鎮壓咗呢場「革命」。

喺宋教仁被殺之後，孫中山主張以武力討伐袁世凱，以推翻袁世凱統治。另一方面，袁世凱就積極進行反革命部署，準備內戰。喺1913年4月，袁世凱同由法國、英國、德國、俄國、日本組成嘅五國銀行團簽署《善後借款合同》，借款2500萬英鎊，作為內戰經費。孫中山同黃興敦促國會否決借款，但點知陸軍總長兼代國務總理段祺瑞好囂張咁帶兵包圍國會，仲話事已至此，唔使講咁多喇。

其後袁世凱罷免咗江西、廣東同安徽嘅國民黨都督，並集結軍隊準備立下。喺1913年7月12日，江西都督李烈鈞宣布獨立，象徵「二次革命」開始，喺其後1個月內有6個省份先後宣布獨立，但由於南方軍隊裝備欠佳，幾個月之內被袁世凱鎮壓，而孫中山、黃興、李烈鈞等人亦先後逃亡日本。

圖為孫中山、黃興等人與日本企業家商討集資討伐袁世凱，取自網絡。