今年周不時都喺電視睇到中美貿易戰、貿易談判等等嘅新聞,而美國總統特朗普最初嘅講法,就係話希望扭轉同中國嘅貿易逆差。其實喺1985年,美國曾經同法國、西德、日本以及英國簽署《廣場協議》,以解決美國兌主要貨幣匯率過高,同埋美國貿易逆差持續擴大嘅問題。不過《廣場協議》唔單止無辦法解決美國自身嘅經濟問題,仲間接令到日本經濟出現衰退。

事緣喺上世紀70年代尾,美國通脹問題嚴重,1979年通脹率達到13%,當時嘅聯儲局主席保羅伏爾克決定加息,導致美元匯價上升。喺1980年至1985年間,美國兌日圓、馬克、法郎、英鎊等國際主要貨幣嘅匯價急升50%,對美國出口造成巨大壓力,拖累經濟。

於是,當時嘅列根政府就向貿易夥伴施壓。1985年9月22日,美國、法國、西德、日本及英國嘅財長同央行行長,喺紐約廣場酒店簽署咗《廣場協議》,確定出手干預匯市,令美元兌日圓同馬克等貨幣嘅匯價逐步下降,當中以日本作出嘅妥協最大,包括進一步對外國商品同服務開放市場、金融市場同日圓匯率自由化、刺激私人消費同投資等等。

簽完協議後,日圓急速飆升,3個月升咗20%,3年內升值超過八成。日本政府憂慮日圓過度升幅損害競爭力,於是透過放寬信貸維持經濟增長,呢段期間日本央行就將基准利率由5%降到2.5%,導致股市同樓市泡沫越吹越大。後來日本當局意識到經濟過熱,喺1989至1990年將基准利率調升到6%,令泡沫爆破,導致日本經濟陷入衰退。

短期而言,簽署《廣場協議》迅速解決美元匯價高估嘅問題,美國貿易逆差問題也得大幅改善,喺1991年仲錄得貿易順差。但隨住1995年經濟全球化加速,美國貿易問題又再次開始惡化。耶魯大學高級研究員史提芬指出,美國貿易逆差係源自美國本身嘅經濟結構問題,例如投資率高於儲蓄率,要解決呢啲問題,先至可以長遠解決對外貿易失衡。到咗今時今日,中美貿易戰能否解決到美國貿易問題?相信時間會係最好嘅答案。

圖為有份簽署《廣場協議》嘅五方代表,取自網絡。