平時睇清宮劇，成日見到啲臣子會寫啲秘密落奏折度，直接俾皇上告狀之類。呢種奏折叫做密折，密折制度始於順治，喺康熙年間推行，再喺雍正時期發揚光大。雍正係史上出名勤力嘅皇帝，咁啱佢繼位之初吏治廢弛、貪污成風，密折正好大大發揮咗佢嘅功用。

密折雖然好用、夠直接，但就唔係個個都有資格寫，要係皇帝信任嘅大臣先得。密折必須由上奏嘅官員親自書寫，寫完之後放入一個特製嘅皮匣入面鎖好。皇帝同官員各有一條皮匣鑰匙，以確保中途唔會有第三個人知密折嘅內容。而密折鎖好之後會直接送去京城，送入宮交俾皇上。1729年，雍正設立軍機處，專門處理密折。每當雍正有機密諭旨要傳俾某某大臣嗰陣，就會交俾軍機大臣，指明要當事人親拆，無得代拆。

雍正對密折嘅朱批非常有個性，用字通俗易明，又唔避俗語，分分鐘好睇過啲野史，例如雍正勸人保重身體：「好生養著，不知你吃酒否？若飲可戒之」；告誡人要慳紙就話「一折一封豈不浪費，便三四折一封何妨」；好口語嘅有「該！該！該！該！不要饒了他們」；雍正覺得好笑就會寫「朕大笑驚訝覽之，朕笑的了不得」等等。批奏折嘅雍正，同我哋平時想象嘅嚴肅形象好唔同。