今日講講民國時期發生嘅「護國戰爭」。話說大總統袁世凱喺1915年12月12日宣布復辟帝制，雲南前任都督蔡鍔聯同一班革命者組織咗護國軍，聲討袁世凱。另一方面，蔡鍔及老師梁啟超响12月23日發出通牒，俾2日時間袁世凱取消帝制。袁世凱say no之後，雲南率先响12月25日宣布獨立，而護國軍亦開始進攻。貴州喺12月27日亦宣布獨立，袁世凱眼見勢色唔對，就宣布推遲1916年1月1日嘅登基計劃。之後廣西又跟住獨立，山東嗰邊又有一支獨立反復辟軍隊崛起，日本政府亦發聲明指，袁世凱政府無權再代表中國，袁世凱最終响3月22日取消帝制。

雖然袁世凱放棄帝制，但呢場護國戰爭仲未結束。袁世凱取消帝制之後，就諗住同蔡鍔談判議和，以恢復內閣制，換取繼續做總統，但護國軍唔收貨，堅持要佢退位。護國軍繼續進攻，廣東、浙江、陝西、四川、湖南亦先後獨立。袁世凱曾經要求部下馮國璋動員支持佢留任總統，點知食咗大大個檸檬。面對部下離棄，袁世凱憂憤交加，最終响1916年6月6日因尿毒症逝世，終年56歲。6月29日，繼任大總統嘅黎元洪宣佈恢復「臨時約法」和國會，護國軍軍務院撫軍長唐繼堯7月14日宣布撤銷軍務院，象徵「護國戰爭」正式結束。

原圖取自網絡。