八國聯軍之役，係中國歷史上嘅慘痛一頁。喺1900年7月13日，八國聯軍進攻天津，用咗一日時間左右就攻入當地。清軍同義和團喺城內奮力巷戰，到咗14日下晝，因為太多人犧牲，於是撤離天津。聯軍趁機喺城內大肆搶掠、姦淫婦女、屠殺平民同燒屋，有軍人走上天津嘅鼓樓，向逃走嘅平民開槍、發炮，有唔少人中彈死亡，亦有人喺混亂中被踩死。一遇到有人反抗，聯軍士兵就開槍將對方擊斃。陷入瘋狂嘅聯軍連死人都唔放過，佢哋挖出棺材，搜刮用嚟賠葬嘅金銀珠寶。

聯軍入城之後，洗劫城內嘅當鋪、金鋪、銀號，以及其他商鋪同各衙署。其中日軍喺鹽運使署搶走200萬紋銀，美軍就喺地底挖出幾百萬紋銀同埋喺鑄造局搶走40萬美元白銀，海防公所入面嘅藝術珍品就被俄軍洗劫一空。經此一役，天津城內無數家園被毀，一片頹垣敗瓦，城內原本有100萬人，但戰後只係剩返10萬人。

原圖取自網絡。