相信大家都聽過「伊利莎白皇后號」呢架郵輪,阿史之前都有提過,伊利莎白皇后號喺1930年代末至1970年代初,係世上最大、最豪華嘅郵輪,全長1,031英尺,排水量達83,600噸。香港「船王」董浩雲喺1970年,斥資320萬美元買入呢架郵輪,仲計劃將呢艘郵輪改裝成一所教育用途嘅流動大學,並改名為「海上學府」。喺1971年7月15日,伊利莎白皇后號終於嚟到香港,停泊喺青衣島同昂船洲之間嘅對開海面進行改裝。

但估唔到呢艘「海上學府」喺1972年1月,進行試航之前幾日,作最後改裝嘅時候突然起火,最終燒咗超過100個鐘頭,全船焚毀沉沒。事件轟動全球,响1974年占士邦電影《鐵金剛大戰金槍客》入面,伊利莎白皇后號嘅殘骸就變成劇中嘅英國秘密情報局水底總部。

圖為伊利莎白皇后號、占士邦,取自網絡。