呢頭中美兩國嘅貿易戰先啱啱停一停,嗰頭美國同法國又再起風雲。法國日前話要向以美國為首嘅大概30間科創企業包括facebook、蘋果、亞馬遜等國際科企徵收數碼服務稅,美國於是啟動「301條款」,調查法國今次徵收嘅新稅係咪不公平貿易。

所謂嘅「301條款」即係美國1974年貿易法嘅第301條,內容係凡係外國政府有任何唔公正、唔合理、差別待遇、或者違反國際貿易協定嘅行為,導致對美國商業發展造成負擔同限制嘅時候,美國總統就可以對該國家採取報復。呢啲報復行動可以係暫停執行特定貿易協定下嘅義務、開徵關稅等。

其實今次已經唔係美國第一次用「301條款」,之前美國先後利用呢個條款嚟徵收中國、日本等國家嘅關稅,好似1985年咁,美國就係用「301條款」對日本進口嘅半導體產品加徵100%關稅,逼到日本要簽《日美半導體協定》,限制出口半導體產品兼响日本市場接受外國製造嘅半導體,令日本半導體產業走向沒落。而特朗普領導下嘅美國政府,响2017年亦引用相關條款嚟調查中國,引爆關稅貿易戰。

至於點解要對美國科企收稅?原來唔單止法國,英國同德國等西方國家質疑,科企特登用財政架構或附屬公司等手段,將部分盈利轉到愛爾蘭等低稅率國家,避免交更多稅。法國今次出招,其實係想推動美國加入國際談判,希望搵到解決方法。不過,美國一旦啟動「301條款」,法國今次嘅數碼服務稅收唔收得成都係未知之數。

原圖嚟自網絡。