早排同兩個同事食lunch,一個叫鹹魚雞粒炒飯,另一個食鹹魚蒸肉餅,唔知叫咩好嘅阿史唯有唱返句「鹹魚白菜也好好味」應吓景。講開鹹魚,大家肯定食過,咁又知唔知鹹魚除咗係嘢食,仲係街名?而家嘅鹹魚街,係德輔道西同干諾道西之間嘅一條橫巷,不過呢條鹹魚街其實並唔係最初嘅鹹魚街,最初嘅鹹魚街位於而家嘅梅芳街同桂香街。至於點解會搬咗,就等阿史今日介紹吓!

話說响香港開埠初期,有唔少華人聚居喺西營盤一帶,有漁民就會响「海旁西」一帶(即係而家嘅德輔道西)擺賣漁產。後來有啲商販就响香港仔、筲箕灣等漁港採購鹹魚去到海旁西一帶擺賣,海旁西同皇后大道西之間,慢慢就形成一群售賣鹹魚同各類海產嘅店舖,而呢一帶最初被稱之為「鹹魚欄」,後來就被正名為「鹹魚街」。

當時鹹魚街嘅衛生環境相當惡劣,去到1894年港島爆發鼠疫,政府宣布鹹魚街成為疫區,唔少樓宇都被拆卸,啲店舖都被迫結業。到咗1904年,鼠疫完全受控,政府就將附近新填海嘅地皮,劃一部分俾鹹魚街店舖嘅舊業主遷入重開店舖,亦因為咁鹹魚街就被「搬遷」到德輔道西同干諾道西之間。而原本嘅鹹魚街,重建之後就被劃成兩條短街,改名稱為「梅芳街」同「桂香街」。大家有無留意到,兩條街嘅街名同霉香鹹魚嘅讀音有咩關聯呢?

圖片為梅芳街,取自網絡。