近排秘書妹妹睇返幾年前嘅舊劇《洪武三十二》，仲問阿史點解套劇要叫呢個名，又問點解朱元璋過身之後個皇位唔傳俾個仔而係傳俾個孫。其實《洪武三十二》即係指1399年，主要講嘅係燕王朱棣發動靖難之變嗰年發生嘅劇情，朱棣篡位之後唔認侄仔惠帝創立嘅「建文」年號，於是夾硬用返之前爸爸朱元璋個「洪武」年號嚟命名。

其實明太祖朱元璋駕崩之後，直接傳位俾皇太孫朱允炆，係因為太子朱標早逝，朱元璋器重太子，所以就揀咗太子個仔朱允炆繼位，是為明惠帝。為咗確保惠帝可以順利登基，明太祖遺詔叫各地藩王唔使入京弔喪，搞到燕王喺上京途中都要返轉頭。當時嘅藩王每人都手握重兵，喺自己地頭作威作福，惠帝聽從大臣齊泰、黃子澄嘅建議，大規模削藩，先廢咗周王嚟牽制燕王，其後湘王、代王、齊王、岷王都先後因罪被廢。惠帝忌憚強大嘅燕王，遲遲未有落手。

1399年，燕山百戶告發燕王謀反，惠帝下詔斥責燕王，並派官員逮捕燕王府屬僚，燕王自稱病重唔出現。眼見各藩王逐一被廢，自己都就嚟遭殃，燕王於是同幕僚商量，引《祖訓》「朝無正臣，內有奸惡」，以清君側嘅名義起兵，仲叫自己嘅兵馬做「靖難」軍。惠帝嘅士兵遠遠多過靖難軍，不過欠缺可以擔大旗嘅武將同佈防，優勢唔大，反而被靖難軍後來居上。呢場叔侄大戰一打就打咗三年幾，最後燕王登基，是為明成祖，而惠帝不知所蹤。

圖為明惠帝、明成祖畫像，原圖嚟自網絡。