上個禮拜，台灣總統蔡英文出發前往加勒比海4個邦交國，展開訪問行程，期間過境美國。而「過境美國」嘅安排往往同中美關係息息相關，喺唔同時候過境美國，台灣總統都會有唔同嘅待遇，亦可以從中窺探中美關係嘅端倪。近排中美關係麻麻，蔡英文就可以高調過境，但以前美國都會盡量低調，避免影響同內地嘅關係，今次就同大家回顧吓台灣總統過境美國嘅歷史先！

喺中美建交之前，台灣政府高層都曾經正式訪問美國，並且獲得高規格接待，例如1967年台灣副總統嚴家淦訪問美國嗰陣，就同當時嘅美國總統詹森一齊响白宮檢閱儀仗隊，而1970年當時係台灣行政院副院長嘅蔣經國訪問美國時，就參加過一場國宴，又同高層官員會面。

到咗1979年中美建交之後，美國基於「一個中國」原則之下，美台領導人一度再無互動。直至1994年，當時嘅台灣總統李登輝出訪中南美洲，就選擇喺夏威夷過境。不過美國因為唔想招惹中國，於是乎態度相當謹慎，只係肯為專機加油同埋俾李登輝响機場貴賓室休息，拒絕批出過境簽證。李登輝梗係好唔滿意，拒絕落機不特止，又著睡衣喺機上見美國在台協會主席白樂崎。喺呢件事發生之後，美國就開始修改法令，容許台灣總統得到「禮遇式過境」。

自此，台灣總統過境美國嘅待遇就逐漸提升。不過响2004年，當時嘅台灣總統陳水扁就因為不顧美國反對，堅持推動「公投立法」同「公投綁大選」，搞到美國好不滿，令過境待遇一次比一次差。响2006年，陳水扁公然違背「四不一沒有」承諾，2007年佢過境美國嗰陣，只能夠响阿拉斯加停留50分鐘加油。

直至2008年，國民黨嘅馬英九接任台灣總統，同美國建立互信，承諾唔會喺政治議題上輕舉妄動，於是佢過境美國嘅待遇比起陳水扁當年好。喺2015年，馬英九過境美國期間，佢重返母校哈佛大學，抵達波士頓嗰陣受到市長同市議長歡迎。

原圖取自網絡。