阿史尋日去咗中央圖書館，去睇一個名為「香港百年 歷史光影」嘅攝影展，展出大約400張新舊相片，阿史最深刻嘅部分就係一系列嘅古今對比相，以及造成多人死傷嘅天災人禍相片，包括1874年甲戌風災、1894年鼠疫、1918年馬場大火、1953年石硤尾大火、1962年颱風溫黛襲港等等。睇完成個展覽，相信可以令大家了解更多香港發生過嘅歷史片段。

展覽分為三個部分：「百年香港滄桑巨變」、「古新建築光影熠熠」、「民俗風物東方之珠」。而最令阿史難忘嘅舊相，係1918年馬場大火，呢宗大火係香港至今死亡人數最多嘅火災，望住張濃煙滾滾嘅相，真係睇見都心傷。响當年2月26日，馬會舉行週年大賽，有大批馬迷走上兩至三層高、由竹枝、木條、草蓆搭建而成嘅馬棚睇賽馬。喺下晝接近3點，仍然有馬迷走上上層看台，令馬棚超出負荷而倒塌。由於馬棚下面有唔少熟食檔，於是馬棚一冧，火爐好快就將成個易燃嘅馬棚燒著，火勢迅速蔓延。當時有好多馬迷被燒死，仲發生人踩人慘劇，最終造成670人死亡，當中大部分都係華人同婦孺。唔少遇難者遺體被燒到面目全非，家屬只能靠遺物辨認親人。

當時東華三院協助將遺體運往加路連山咖啡園墳場下葬，又建成「戊午馬棚遇難中西士女公墓」同豎立「馬場先難友紀念碑」，每年都派人去掃墓。到咗2015年10月，香港政府將「馬場先難友紀念碑」列為法定古蹟。其實攝影展仲有唔少珍貴嘅歷史相片，史友有時間不妨去睇吓。