70年前，係中國近代史上嘅重要一年。當年初正值國共內戰後期，國民黨喺幾場重要戰役失利之後，總統蔣介石响1949年元旦發出聲明求和，要求喺唔違反中華民國憲法、唔破壞憲政、確保國體、唔中斷法統同埋保障軍隊等五項要求下，同共產黨議和。結果遭到共產黨中央委員會主席毛澤東拒絕，並提出喺懲辦戰犯、廢除偽憲法、廢除偽法統、改編反動軍隊、沒收官僚資本、改革土地制度、廢除賣國條約、成立聯合政府等八項條件基礎上議和。由於議和計劃失敗，蔣介石其後宣布引退，由副總統李宗仁代理總統職務。

李宗仁接任之後，宣布願意喺八項條件基礎上談判。4月1日，以中央軍委副主席周恩來為首嘅共產黨代表，同埋以西北軍政長官張治中為首嘅國民黨代表，喺北平（而家嘅北京）開始談判。經過多番討論之後，國民黨代表就派人將《國內和平協定（最後修正案）》送返南京，周恩來要求南京嘅國民黨政府响20日之前回覆，警告如果對方唔接受，就一定會過江進攻。最終國民黨政府拒絕接受《協定》，結果解放軍就响4月21日渡過長江發起進攻，無幾耐就攻佔咗南京。

圖為北平談判、蔣介石，取自網絡。