喺46年前今日,32歲武打巨星李小龍猝逝,震驚全港。由於李小龍响台灣女星丁佩家中逝世,加上事發突然,多年來引起外界唔少揣測。後來法院召開死因聆訊,裁定死因係李小龍對止痛藥物產生高度敏感導致腦水腫,其中一個講法就話李小龍曾因舉重意外導致脊椎脫位,需要長期食肌肉鬆弛劑,當時佢唔舒服,食止痛藥嘅時候產生過敏反應而出事。另有講法就係話李小龍因為壓力太大、缺乏睡眠而誘發「癲癇猝死症」等等。

前排就有新聞,講起李小龍生前位於九龍塘金巴倫道嘅居所將會重建。李小龍死後第二年,商人余彭年以85萬元買入李小龍故居,並改裝成時鐘酒店,余彭年曾經提出捐出李小龍故居作為博物館,但未能同政府達成共識。余彭年逝世後,李小龍故居撥入「余彭年慈善信託」,據報信託曾經向政府提出由政府收購地皮,或者以「地換地」方式收回李小龍故居,但得唔到當局正面回應。信託搵專業人士睇過之後,發現李小龍故居出現石屎爆裂、鋼筋外露等問題,需要重建。信託負責人就話會保留李小龍最鍾意嘅一幅馬賽克壁畫同大宅窗花,不過唔少人認為重建之後,故居將會面目全非。

圖片為李小龍及其故居,取自網絡。