尋日有立法會議員嘅父母墳頭被破壞，事發原因係點同兇徒係咩人，外界有多種唔同講法，引起大眾議論。不過喺文化大革命嗰陣，有唔少名人或者佢哋嘅祖墳都曾經受到破壞，甚至被挖出屍體侮辱，當中包括先賢孔子；歷史名人康有為、張之洞，以及蔣介石母親同宋慶齡父母等等。

喺1966年，一批紅衛兵去山東曲阜孔廟搗亂，喺11月9日至12月7日期間，破壞咗超過6000件文物，孔子像被毀，另外古書2700冊、字畫900幾卷、過千塊石碑遭到焚毀。最後呢班紅衛兵連孔子墓都唔放過，一邊背《毛主席語錄》，一邊用炸藥炸開孔子墓。紅衛兵連其他孔子後人都唔放過，孔子第76代嫡孫、衍聖公孔令貽都被掘出曝屍。

除咗孔子，紅衛兵亦都掘出清朝重臣康有為同張之洞嘅屍體，當時康有為嘅頭骨被放到手推車上，一班紅衛兵就推住康有為個頭遊街示眾，仲貼上「中國最大的保皇派康有為的狗頭」嘅字句。而張之洞被掘出之後，就被曝屍示眾，任由啲小朋友踢佢、整佢。

當時內地視中華民國總統蔣介石為大敵，蔣介石自己去咗台灣，但蔣家祖墳就留咗喺內地，結果蔣介石生母個墓被當時嘅學生掘開，屍體被棄置喺樹林。而蔣介石岳父岳母、宋慶齡嘅父母，亦都被紅衛兵掘出棺材，甚至遭到揚屍拋骨，宋慶齡收到消息之後非常傷心，急忙寫信俾總理周恩來求助。

到咗今時今日，無論係咩原因，損壞人哋已故父母嘅墳墓，都係非常缺德嘅行為。

圖為紅衛兵破壞孔子墓，取自網絡。