近排有議員父母喺良田村嘅墳墓被人毀壞，令呢條良田村引起廣泛關注。良田村其實係一條位於屯門嘅客家原居民村，之前有史友話想知多啲關於新界原居民嘅歷史，阿史今日就簡單講講。唔少人都知，新界佔咗香港唔少土地面積，咁究竟「新界」係點嚟呢？當初原居民又係點定義？一切一切，要由1898年中英簽訂嘅《展拓香港界址專條》講起。

根據呢個專條，英國向中國租借「新界」99年，呢個「新界」範圍為廣東省新安縣境內由沙頭角到深圳灣之間最短距離直線以南、英國九龍割佔地界限街以北嘅廣大地區，包括大嶼山在內嘅附近島嶼同大鵬、深圳兩灣水域。新界租借後，港英政府就將喺陸上務農嘅村民界定做原居民，《專條》亦承諾「不可將居民迫令遷移，產業入官」。

不過新界居民對殖民者並唔信任，1899年英軍接管新界時，遇到部分新界鄉民反抗，引爆「六日戰爭」，造成唔少鄉民死傷。英軍當年炸毀著名圍村吉慶圍嘅鐵門，並將道門運返英國，當係戰利品。隔咗二十幾年之後，道鐵門運返吉慶圍，立碑記錄發生嘅歷史事件，等後世居民唔好忘記當年嘅遭遇。

原圖嚟自網絡。