一場地震，令一座城頓變孤島。今日係唐山大地震43週年，喺1976年7月28日凌晨，河北唐山發生7.8級地震。當時係新興重工業城市嘅唐山，頓時變成一片廢墟。受地震破壞區域約21萬平方公里，嚴重破壞區都有成3萬幾平方公里，無論係老式單層民房定係鋼筋混凝土高層建築物，都未能倖免，累計死亡人數超過24萬，重傷超過16萬人，受輕傷嘅人不計其數。唐山大地震發生之後，鐵路同公路都受到嚴重破壞，空路成為唯一救災路線。

之不過，當時電力中斷，跑道燈熄晒、無導航設備，同樣受損嘅唐山機場，唯有依靠調度室嘅人員憑住耳仔同肉眼，指揮飛機升降，最高峰嘅時候平均2分鐘就有一架飛機升降，可以話係航空史嘅一個奇蹟。喺地震發生之後第15日，唐山通往外界嘅陸路先至打通，此前十幾日關鍵期裡面，2萬幾名傷者同埋無數嘅救災物資主要依靠飛機同機場進出。政府當時一共出動10幾萬名解放軍、2萬幾個醫務人員同埋幾萬個支援人員去唐山救災，用咗20幾日終於初步控制災情。

原圖取自網絡。