末代皇帝溥儀個爸爸、光緒帝個細佬醇親王載灃，相信大家都知佢係邊位，但唔講唔知原來佢曾經出訪過德國，途中仲嚟過香港添！不過載灃此行目的，係代表光緒去德國就「克林德事件」向德皇道歉嘅，所以行程相當低調。載灃响1901年7月12日出發去到天津大沽口，登上招商局嘅「安平號」，17日抵達上海。停留3日之後，載灃喺德國黎克特少將、霍普夫納少將以及呂特維茨伯爵陪同下，轉乘德國郵船「拜安號」經香港前往德國。

喺7月25日，拜安號抵達香港，停泊喺九龍船塢三號碼頭。由於載灃係首位訪問香港嘅滿清親王，所以港英政府相當重視，原先安排咗鳴放二十一響禮炮同埋隆重登岸儀式，不過載灃要求保持低調，最後官方儀式從簡，改為軍艦鳴放響炮、升起黃龍旗致意。港督卜力安排軍官登上拜安號迎接載灃，並陪同載灃登上「維多利亞號」前往中環美利碼頭，上岸後再坐轎上總督府。卜力去到門口迎接載灃，卜力夫人送咗手繪嘅香港土地同香港種植嘅黃蓮花做禮物，以表誠意。載灃同卜力會面大約45分鐘之後，齊齊遊覽總督府，仲主動提出影相留念。

載灃應華商邀請出席午宴，之後再會合卜力、輔政司駱克、港督私人秘書莊士敦等人，搭纜車上太平山山頂，觀賞維港景色，載灃曾經响日記上面形容山頂「海風徐來，令人氣爽」。下晝3點半，載灃就上返拜安號，華商喺碼頭燒炮仗，各國船隻鳴炮相送。最後拜安號喺添馬艦等英國軍艦護送之下，離開維港，繼續前往德國。

圖片為載灃、卜力合照，取自網絡。