近期發生嘅衝擊事件令元朗備受公眾關注,而過去嗰個星期嘅遊行亦令元朗嘅南邊圍村廣為人知。南邊圍村其實係元朗十八鄉嘅一條村,鄰近元朗西鐵站、西邊圍村、元朗中心同埋YOHO,交通方便。而南邊圍嘅長盛街、酒街同利益街保留咗唔少古物,長盛街更被稱為「滿清一條街」。

尋日同大家講過《遷界令》,其實佢同南邊圍村嘅歷史亦有關係。元朗自宋朝開始就有人嚟開墾同生活,喺明代就設立大橋墩墟,俾村民做買賣。1661年,朝廷頒布《遷界令》,廣東沿海所有居民要遷徙去內陸,令元朗建立起嚟嘅墟市被棄置。到咗康熙年間復界,居民返鄉下生活,錦田一個官紳鄧文蔚就喺西邊圍同南邊圍之間整咗個墟市,貪嗰度靠近元朗涌,方便啲船停泊同起卸貨物。墟市嘅設立等村民到時到候有個地方進行買賣,令嗰度逐漸成為區內最大農產品集散地,亦多咗人喺附近聚居。

1949年之後,區內人口增加,令鄉村市集慢慢轉變為市鎮雛型。去到近代,就不得不提叱咤一時嘅均來集團創辦人戴權,佢係南邊圍原居民,曾經做過十八鄉鄉事委員會主席35年,仲做過5屆元朗區議會主席。根據報道,最高峰時期,戴權家族曾擁有元朗大馬路半數嘅店鋪,所以佢又有「元朗大地主」稱號。

原圖嚟自網絡。