上星期提過國共爭奪山西嘅情況，今次講埋上海。共產黨喺1949年5月佔領上海，國民黨當然唔會咁輕易放手，隨即對沿海口岸實行軍事封鎖。喺1949年6月至1950年5月期間，國民黨派空軍响上海作出71次轟炸掃射，投彈接近600枚，造成超過4500人傷亡。其中，响1950年2月6日嘅轟炸最慘烈，被稱為「二六轟炸」。

响當日早上，國民黨出動17架軍機，針對楊樹浦發電廠、閘北水電公司、南市華商電氣公司、盧家灣法商水電公司等目標，投擲六七十枚重磅炸彈，炸死542名市民、836人受傷，超過2500間廠房、民房受到破壞，受災人數超過5萬。單單喺楊樹浦發電廠，就被10枚炸彈炸中，三分二發電設施損壞，無法運作，令上海大部分地區停電。上海市政府組織超過2000位來自各行各業嘅職工連夜清理同搶修，花咗大約42個鐘先完成搶修，恢復供電。

最後，蘇聯派出空軍連同百幾架戰機參戰，擊落部分國民黨戰機，扭轉形勢。面對共產黨來勢洶洶嘅幫手，國民黨決定優先保衛台灣地區安全，令空襲告一段落。

圖為當年被炸毀嘅楊樹浦發電廠，取自網絡。