「大東亞共榮圈」呢個名詞相信大家都耳熟能詳，日本喺第二次世界大戰期間，藉住所謂「大東亞共榮圈」建設，向其他東亞國家發動戰爭。「大東亞共榮圈」最初係由日本外相松岡洋右响1940年8月1日見記者，發表《基本國策綱要》嘅時候提出嘅，松岡洋右當時宣布，要確立以日滿華（日本、偽滿洲國、中國）為其一環嘅大東亞共榮圈，自此呢個名詞就陸續出現喺日本各種文件。根據日本其後制訂嘅《南方經濟施策綱要》，提到大東亞共榮圈除咗日滿華之外，仲包括法屬印度支那、泰國、緬甸、荷屬東印度、菲律賓、英屬馬來亞、婆羅州、葡屬帝汶等內圈地帶，以及英屬印度、澳大利亞、新西蘭等外圈地帶，可見日本當時嘅野心有幾大。

日本佔領咗東南亞以及西太平洋島嶼等地區之後，喺1943年11月响東京召開「大東亞會議」，6個由日本扶持嘅傀儡政府代表出席會議，包括偽滿洲國首相張景惠、汪偽國民政府行政院長汪精衛、泰國王子汪歪搭雅昆·瓦拉汪、菲律賓總統勞威爾、緬甸總理巴莫、自由印度臨時政府首席代表錢德拉·鮑斯等等。會後發表《大東亞共同宣言》，當中提到「開放資源，以此為進軍世界做貢獻」，曝露日本喺東亞國家掠奪資源、稱霸世界嘅野心。

《大東亞共同宣言》入面亦提到「共存共榮」、「自主獨立」、「相互尊重」、「緊密提攜」等等，不過事實上日本發動嘅戰爭造成生靈塗炭，例如侵華期間造成3500萬人傷亡，菲律賓亦有過百萬人戰死或遭到屠殺，而越南北部因為被日軍搶走晒啲糧食，導致200萬人餓死、病死。

圖片為大東亞會議，取自網絡。