早幾年好多人追韓劇,近年啲內地劇集亦有唔少人睇,不過阿史就覺得都唔夠以前嗰啲咁hit。喺90年代,無綫買入嘅《同一屋簷下》主力sell親情,唔少觀眾都睇到眼濕濕,當時就獲得21點嘅收視,戲入面嘅主角江口洋介、福山雅治同酒井法子,亦因為呢套劇而成為當時炙手可熱嘅明星。

《同一屋簷下》講述柏木家一家八口,父母因為交通意外身亡,六兄妹被送往唔同家庭寄住,長子柏木達也(江口洋介飾演)成年之後希望搵返細佬妹,重新建立家庭。呢套劇對阿史最深刻嘅就係,大哥達也同二哥雅也(福山雅治飾演)竟然一齊鍾意咗本身係養女嘅妹妹小雪(酒井法子飾演),而呢段兄妹三角關係要去到第二輯先至明朗化,最後小雪同雅也有情人終成眷屬。

圖為劇照,取自網絡。