阿史早排帶媽媽去換新智能身份證，換返嚟嘅新證都幾靚吓。隨住時代變遷，身份證變得越嚟越先進，睇返最初期1949年簽發嘅身份證，只係一張硬質紙，有黃、粉紅同淺藍三隻色。對比返依家嘅智能身份證，真係有好大分別。

除咗原先嘅紙版身份證外，去到1960年6月先出現卡形嘅膠面身份證，正面係持證人嘅相片同左邊拇指指模，個人資料就喺背面，男女仲分唔同顏色添。而第一代電腦身份證就喺1983年3月推出，證件由防偽水印紙所製，上面嘅資料改為電腦噴墨打印，加咗塑膠影膜保護，其設計大細同樣式成為第二代電腦身份證嘅基礎。第二代電腦身份證更細分為香港永久性居民身份證同香港身份證，其中永久性居民身份證上註明咗持證人享有香港居留權。

隨住社會發展，普通印有個人資料嘅身份證已經唔能夠滿足現代人需要，於是入境處喺2003年6月23號開始簽發智能身份證，當時全香港一共用咗差唔多四年時間換證件。智能身份證加入微型晶片嚟儲存持證人嘅指紋，具高度防偽功能。不過隨住時間過去，初代智能身份證儲存相片同指模影像系統漸漸出現問題，好似2009年出現5單事故，2013年數字更增加6倍，2014年仲有超過6000單晶片損壞報告添，所以更換智能身份證係有需要嘅。至於今次最新一代嘅智能身份證就比舊版耐用、防偽特徵更強，晶片喺保障個人資料嘅技術亦有所提升。

原圖嚟自入境事務處。