阿史近排聽返尹光嘅《你老闆》，啲歌詞真係道出咗廣大打工仔嘅心聲。入面有一個詞叫「揸流攤」，宜家已經好少人會講，唔知有無史友記得呢個詞點解呢？

揸流攤其實係話人做嘢馬虎，呢個詞原先係一個賭博術語，係指舊時啲人喺玩番攤嗰陣出千。話說玩番攤嘅時候，莊家會用攤盅隨意蓋走枱上部分攤子（攤子可以係衫鈕、圍棋、蠶豆等），再用支竹嚟點算剩低嘅攤子。有啲莊家會請兩個助手幫手，其中一個負責用手揸走部分攤子，呢個行為就叫做「揸攤」，另一個就將揸出嚟嘅攤子用攤盅覆蓋。「揸流攤」就係指揸攤子嘅人為咗協助莊家或賭客贏，特登揸剩某個數目嘅攤子嚟出千。由於揸攤嘅人有機會同賭客串通嚟呃莊家嘅錢，所以「揸流攤」之後又引申為打工仔趁住老闆唔喺度，做嘢求求其其、敷衍了事。

圖為1890年代嘅番攤檔，原圖嚟自網絡。