今日係著名詩人泰戈爾逝世78周年，佢嘅代表品《新月集》依然係印度大中小學嘅必選文學教材之一，亦有唔少華人好鍾意佢嘅詩。呢位詩人年紀細細已經好犀利，佢8歲開始寫詩，12歲開始寫劇本，15歲就發表咗第一首長詩，52歲更憑住《吉檀迦利》成為第一位獲得諾貝爾文學獎嘅亞洲人。泰戈爾生前曾經三次到訪中國，展開咗一場中印文化交流之旅。

1924年，泰戈爾應戊戌變法發起人梁啟超、北京大學校長蔡元培之邀，第一次訪問中國。佢乘搭「熱田丸號」抵達上海，仲喺「熱田丸號」嘅甲板上同詩人徐志摩、著名學者張君勱、作家鄭振鐸等人合照留念。幾日後，泰戈爾喺杭州靈隱寺演講，隨行嘅仲有著名京劇藝術家梅蘭芳。

泰戈爾同中國嘅交流遠不限於文化層面，當抗日戰爭爆發後，佢曾多次公開痛斥日本嘅侵略行為，更帶頭發起募捐，用行動支援中國。另外，佢仲喺印度國際大學入面設立中國學院，專門培養中國留學生。

原圖為泰戈爾同梁思成夫婦、徐志摩合照，取自網絡。