一粒糖，除咗甜味，仲有回憶。阿史前排見到有媒體報道，話本地糖果廠史蜜夫糖廠即將結業。睇返佢哋啲糖，就諗起以前過年全盒嘅多種類糖果，以及細個去零食鋪買零食嘅日子。目前本地製作嘅零食買少見少，而响香港生產嘅史蜜夫糖廠係少數本地薑品牌，代表作包括牛奶鳥結糖、橙花軟糖同蜜瓜軟糖等等，根據啲報道話，佢哋用晒現時材料就會結業唔做。

史蜜夫糖廠嘅創辦人係方南，佢响解放前由東莞落嚟香港，最初喺親戚嘅糖果廠做銷售員，之後自立門戶，喺筲箕灣開山寨廠。到咗60年代，旺角通菜街史蜜路士（SMILES）糖果廠清盤，方南就同拍檔頂咗嚟做，改名為「史蜜夫」 （SMITH），直至70年代買入而家嘅觀塘廠房，其後由方南3個仔經營至今。

史蜜夫糖廠响70年代風光一時，搬去觀塘廠房之後，推出橙花軟糖，喺工展會爆紅，產品遠銷到內地各省市。不過後來內地出現唔少糖果廠，以平價發售產品，令史蜜夫生意大受打擊。到咗2001年廣南（KK）超級市場全線結業之後，就好少再喺超級市場同便利店見到史蜜夫嘅蹤影。而家方氏3兄弟即將退休，相信之後再見到史蜜夫糖廠出產嘅糖機會唔係好多，喺出面見到嘅話就要入定貨喇！

圖為史蜜夫軟糖，取自網絡。