阿史之前都介紹過吓梅蘭芳呢位京劇大師嘅生平，佢生於梨園世家，爺爺梅巧玲係著名旦角演員、「同光十三絕」之一，爸爸梅竹芬亦係昆曲、京劇旦角演員，媽媽母親楊長玉就係著名武生楊隆壽個女。梅蘭芳父母早逝，細細個就由本身係京劇琴師嘅伯父梅雨田撫養成人。梅蘭芳8歲開始學戲，10歲就第一次登台，1913年憑住演出《穆柯寨》一舉成名。梅蘭芳女裝扮相古典優雅、演出技巧出神入化，被譽為「四大名旦」之首。不過响第二次世界大戰期間，佢選擇蓄鬚明志，堅拒為日本人表演，直至1945年日本投降，梅蘭芳先至剃鬚復出舞台。响1961年今日，梅蘭芳喺北京病逝，終年66歲。

抗戰爆發之後，上海淪陷，梅蘭芳帶同家人逃到香港。其後香港被日軍佔領，1942年1月，日軍師令酒井隆見到梅蘭芳成面鬍鬚嘅樣，就覺得好驚訝，問佢做咩留鬚同退出舞台。梅蘭芳就話自己唱旦角，年紀大個樣唔好睇、把聲唔得，唔可以再演戲，於是喺屋企頤養天年。

酒井聽完，嬲爆爆咁走咗，此後日軍多次想逼梅蘭芳演戲，甚至係威嚇佢，但梅蘭芳依舊say no。因為梅蘭芳拒絕演戲，搞到佢無晒收入、生活緊拙，唯有賣咗自己北京層樓，應付香港嘅生活。直至收到抗日戰爭勝利嘅消息，梅蘭芳即日就剃鬚，上台表演慶祝，吸引無數人嚟觀賞，向佢嘅氣節致敬。

圖為梅蘭芳，取自網絡。