尋晚係中國情人節七夕,太空館外面相當熱鬧。講開呢個尖沙咀地標,原嚟佢並唔係大家所見嘅半圓形,而係雞蛋嘅一半。當初香港太空館就係以「蛋殼」呢個概念嚟興建東翼,取自古代宇宙論嘅「渾天如雞子」,即係話天空好似一個大雞蛋殼咁,而地就係蛋殼入面嘅蛋黃。

太空館喺1980年啟用,其原址係尖沙咀火車站,直至70年代初,火車站先遷往紅磡。當時市政局決定興建一間以天文科學為主題嘅博物館,向市民推廣天文學同太空科學知識,於是喺1977年動工興建太空館。

太空館斥資6000萬港幣興建而成,係世界上最先進嘅天文館之一,佢當年第一批喺太空館展出嘅展品,就係人類第二次飛往太空嗰陣所乘坐嘅「極光7號太空囊」。1962年,美國「擎天神式火箭」運載太空囊發射升空,環繞地球飛行三周。而太空館展出嘅就係呢個太空囊,仲有太空衣、飛行日誌、太空人食物等,全部都係由美國太空總署(NASA)借出、上過太空嘅珍貴展品。

原圖嚟自網絡。