如果去到生命最後一刻，大家仲有咩想做？讀書時期有篇《爸爸的花兒落了》係取自作品《城南舊事》，而作者林海音好特別，據說佢臨死前後悔無用曬啲錢。查返資料，林海音當年用自己賺返嚟嘅錢買咗好多層樓，到咗65歲，佢突然宣佈關咗出版社雲遊四海，過咗幾年就用晒啲錢，一無錢就賣樓，結果到佢82歲過身嘅時候仲有幾層樓未賣晒，於是就有呢個遺憾。

林海音原名林含英，祖籍台灣，不過就喺大阪出世、北京長大。佢嘅代表作《城南舊事》，紀錄咗主角英子喺北京城南嘅童年回憶，作品之所以寫得咁地道、真實，正正就係因為林海音自細生活喺北京城南。林海音讀書嗰陣就鍾意睇書刊、雜誌，又因為當時流行學生話劇，令林海音吸收到新文化知識。當林海音聽講《世界日報》、《世界畫刊》嘅社長創辦咗「北平新聞專科學校」，學生唔使交學費不突止，仲可以一邊上堂一邊喺報館實習之後，林海音就報名入學。

1935年，林海音正式入《世界日報》工作，採訪文教同婦女新聞，仲因此識咗佢後嚟嘅丈夫夏承楹。1948年，已為人母嘅林海音同丈夫舉家返台灣，繼續從事寫作、辦刊嘅工作。佢一生共出版咗18本書，創辦、經營純文學出版社26年咁耐。

圖為林海音夫婦，原圖嚟自網絡。