喺1974年嘅今日,美國總統尼克遜因為「水門事件」而辭職,成為美國史上首位辭職嘅總統。導致尼克遜辭職嘅「水門事件」响1972年6月17日凌晨發生,當時華盛頓民主黨全國委員會總部水門大廈嘅保安,發現門鎖有古怪所以報警,警員到場後抓獲有5名安裝偷聽器同拍攝文件嘅男子,仲揭發呢5名男子嘅資金來源係同尼克遜嘅籌款組織有關。

1972年正值美國總統選舉年,屬共和黨籍嘅尼克遜否認同事件有關,並且成功連任。不過喺《華盛頓郵報》記者伍德沃德(Bob Woodward)同伯恩斯坦(Carl Bernstein)追查之下,踢爆尼克遜政府有參與行動,其後仲有白宮職員「爆料」,揭發尼克遜辦公室有錄音系統。喺傳媒持續報道之下,尼克遜支持度屢創新低,最後喺國會彈劾調查同最高法院介入下,交出錄音記錄,證實尼克遜有份參與事件。做過嘅嘢,始終係要負責,尼克遜最後於1974年8月9日辭去總統一職,由副總統福特繼任,福特上任之後決定特赦尼克遜任內嘅罪行。 

伍德沃德同伯恩斯坦之後出版咗《驚天大陰謀》(All the President’s Men),記錄水門事件嘅始末,書中以「深喉」形容一位FBI高層爆料人士。喺2005年,FBI副局長嘅馬克·費爾特(Mark Felt)承認,自己就係大家搵咗好耐嘅「深喉」。

圖片為尼克遜宣布辭職、辭職信,取自網絡。