阿史屋企嘅海味乾貨食得七七八八,史媽就去附近嘅南北行入貨。講開南北行,大家可能只知佢主要經營海味生意,但其實南北行經營參茸海味生意只係源於50年代。最初嘅南北行,可以話係經營貿易嘅廣州十三行翻版,而南北行得以發揚光大,就不得不提白手興家嘅華人行商鼻祖——高滿華。

南北行嘅建立同經營中暹貿易生意嘅元發行有關,高滿華喺1853年接手元發行之後,開始擴充發展,喺曼谷設立米廠,再將白米出口到香港,然後轉運去中國其他城市。元發行發展嘅同時,上環文咸街一帶嘅華商亦不斷擴大,咁啱呢啲華商主要合作地區為中國內地、南洋地區,呢兩大地區位於香港嘅南邊同北邊。所以,好似元發行呢一類從事轉運貿易、靠代客出售貨物嚟賺取佣金嘅商行統稱為「南北行」。

做生意嘅人多咗,好自然就會分幫分派,各幫派嘅紛爭不斷,於是高滿華就聯同各派代表成立「南北行公所」,以排解紛爭、平衡各行業競爭。之後,高滿華向清廷捐咗一個正五品嘅官,就財富、地位而言,佢儼然成為「南北行」嘅領袖人物。1869年,政府籌辦東華醫院,南北行同業推薦高滿華做倡建總理。1877年華北大旱,高滿華喺香港、暹羅、新加坡各地勸捐,成效不俗,清廷更賞咗「即用知府加五級」俾高滿華,以示表揚。

圖為高滿華畫像同南北行公所,原圖嚟自網絡。