上星期講起香港禁煙花炮仗嘅歷史，今日就再講講香港歷史上其中一宗好嚴重、同炮仗有關嘅工業意外，呢次意外造成32人死亡、56人受傷，死者包括一個只有六個月大嘅男嬰，令人心噏。

意外响1921年2月25日嘅下晝2點鐘發生，位於何文田嘅「台山電光爆竹廠」有161名女工做緊嘢，當時有工人搬運400幾箱炮仗，準備付運去英國。但點知，工人將炮仗裝箱完、為箱蓋加釘鞏固嘅時候，因為用力太猛，令鐵鎚觸及火藥，引起爆炸。一個箱爆炸，其他都跟住連環爆，唔少人都被炸到焦頭爛額、血肉模糊，成個工場都火光紅紅，直至夜晚9點消防員先至將火完全救熄。

爆炸發生後，有逃出火場嘅女工頭、頸等部位燒傷，連件衫都燒著埋，當時喺廠外叫工人搬貨嘅總經理胡元攀，就幫啲女工除咗燒著咗嘅衫，搞到自己對手被火燒傷。有女工走出工廠之後，因為繼續奔跑而令身上嘅火勢緊猛烈，當場燒死。死者當中包括一個半歲男嬰，相信係因為當時工人缺乏工業安全意識，再加上缺乏社區配套，導致小朋友受害。

圖為何文田近照，取自網絡。