燦爛輝煌嘅背後，亦曾經歷黑暗傷痛。上次講起香港半島酒店嘅歷史，有史友就提到間酒店响二戰期間係日軍總部，今次阿史就同各位介紹吓。日軍1941年12月佔據九龍之後，就喺半島酒店設置臨時總部，其後繼續進攻港島。喺同月25日，港督楊慕琦帶領一眾官員過海，嚟到半島酒店嘅336號房簽下投降書，向日軍投降，代表香港於「黑色聖誕節」正式淪陷，楊慕琦更一度被軟禁喺半島酒店入面。三年零八個月期間，半島酒店被改稱為「東亞酒店」，直至1945年日軍喺酒店宣布投降。

香港重光之後，英軍喺半島酒店商討接管政府機關、警署，又設醫療站，為被日軍俘虜嘅公務員同英軍提供醫療服務，隨後又用半島酒店收容無家可歸嘅人，直至1946年先至交返俾業主。以上歷史片段都顯示，半島酒店陪伴香港走過一段漫長歲月，曾經同甘共苦，再迎接曙光。

圖片為楊慕琦喺半島酒店向日軍投降，取自網絡。