尋日有大批市民去赤鱲角集會,機場運作受影響,唔少航班被取消。原來機場以前都試過因為其他原因導致無法正常運作,當時仲造成唔少損失。話說响1998年7月6日,位於赤鱲角嘅香港國際機場正式運作,取代舊嘅啟德機場,但點知運作無幾耐,新機場嘅貨運站、電腦系統、機械設備都發生嚴重故障,令大批離港貨物滯留機場,每日損失達18億元!

去到7月13日下晝,時任特首董建華向國務院港澳辦求助,希望容許要進出香港嘅貨機借用深圳黃田機場(而家嘅寶安機場)。董建華嘅要求好快就轉送到當時國務院總理朱鎔基手上,朱鎔基批示全力支持、特事特辦。港澳辦隨即同民航總局、公安部、海關、交通部各部部長舉行會議討論方案,最後批准黃田機場來往香港嘅貨物一律免檢簽關、貨運航班嘅機組人員同維修人員自由來往深圳同香港,幫助赤臘角機場渡過難關。

圖為赤鱲角機場,取自網絡。