入行超過60年嘅資深演員夏萍日前離世,終年81歲。夏萍原名盧少萍,响1955年加入電影公司,成為粵語片演員。「夏萍」呢個名,有講法話係佢年輕時嘅樣貌同傳奇影星柯德莉夏萍相似,另有報道話,「夏萍」係由導演吳回喺60年代幫佢改嘅。夏萍一生拍過無數經典電影同電視劇,包括喺《九品芝麻官》入面飾演包龍星(周星馳飾演)嘅媽媽,拎明朝嘅尚方寶劍斬清朝官,令觀眾留下深刻印象。

夏萍先後喺1970年加入邵氏電影、1982年加入無綫電視。佢拍過唔少經典作品,好似喺1996年「第15屆香港電影金像獎」,佢就憑住喺《烈火戰車》入面飾演錢嘉樂個外婆,入圍最佳女配角,仲曾經喺處境喜劇《皆大歡喜》時裝版入面飾演劉錦(由阮兆祥飾演)嘅養母七姐。夏萍參與嘅電視劇多到數唔晒,可以話係陪住大家成長,2005年獲得「萬千光輝演藝大獎」,表揚佢嘅演藝貢獻,近年因為健康問題淡出幕前,而2015年《城寨英雄》就成為佢最後一套現身於公仔箱嘅作品。唔知各位史友睇過佢最深刻嘅角色係咩?不妨留言齊齊懷緬吓。

圖為《九品芝麻官》劇照,取自網絡。