今日係農曆七月十四，唔少人都以為今日係盂蘭節嘅正日，但其實唔完全係。盂蘭節正日係農曆七月十五日嘅子時開始，直到第二日嘅子時，即係今晚11點至聽完凌晨1點先係正日。

盂蘭節又叫做鬼節或中元節，相傳係起源於佛祖釋迦牟尼嘅徒弟目連。據《盂蘭盆經》記載，目連嘅母親好有錢，但就為富不仁，做過唔少衰嘢，於是死後墜入餓鬼道，飽受折磨。目連用天眼通睇到母親嘅苦況，好心痛，於是用法力將飯餸送俾母親，可惜飯餸一送到母親口邊就化為火焰。目連求佛祖救救佢母親，佛祖話呢個係佢母親生前作嘅孽，非佢一人之力可以化解，必須集合眾人嘅力量。於是佛祖教目連喺七月十五呢日為過去七世嘅父母同宜家受苦嘅母親準備祭品，供養僧眾，以超渡亡母，免佢受餓鬼道之苦。而呢個傳說亦成為習俗，不斷演變成宜家嘅鬼節風俗。

每年由農曆7月開始，香港各區會陸續舉辦盂蘭勝會，活動包括祭祀、燒街衣、派平安米、演出神功戲等。而香港嘅盂蘭勝會更喺2011年被列入第三批《國家級非物質文化遺產名錄》之中。

原圖嚟自網絡。