上個禮拜講咗西漢廢帝劉賀只係做咗27日皇帝就被廢,而下旨廢黜佢嘅,係只得15歲嘅上官皇太后。話說呢位皇太后嘅外祖父係大將軍霍光,上官氏初初做皇后時已經好後生,6歲就登上后位。咁佢做皇太后同太皇太后嗰時幾多歲?15歲,用返今日嘅標準,仲未成年佢已經坐於高位。

據《漢書•外戚列傳》載,上官皇后出身顯赫,祖父係漢武帝時期嘅太僕,父親係左將軍之子上官安。公元前87年,漢武帝駕崩,8歲嘅漢昭帝登基,由昭帝大家姐鄂邑蓋長公主代為養育。幾年後,漢昭帝擬立皇后,上官安想推薦自己個女入宮,但霍光覺得外孫女尚年幼,唔肯,上官安於是用計令長公主將自己6歲嘅女召進宮做婕妤。入宮不過月餘,上官氏就升做皇后。

漢昭帝繼位初期,朝政由霍光把持,咁啱漢昭帝身體經常不適,而霍光為咗令上官皇后早日有孕,叫御醫上奏建議昭帝禁內,除咗皇后之外應少近女色。雖然後宮得返上官皇后,但直至昭帝駕崩兩人都未生到一兒半女,亦因此劉賀先得以繼位。《漢書》記載,之後宣帝登基,尊上官氏做太皇太后,時年15歲。

圖為上官皇后劇照,原圖嚟自網絡。