繼資深演員夏萍之後，另一位老戲骨梁舜燕今日逝世，令唔少觀眾覺得好悲傷同好可惜。其實除咗「唐太宗活絡油」嘅廣告之外，梁舜燕仲演出過唔少經典劇集同角色，好似處境劇《真情》嘅「上等人」、《包青天再起風雲》入面烏盤案嘅安人等等。唔講唔知，拍劇拍到出神入化嘅佢，原來當年係電視嘅首代新聞之花？

話說梁舜燕當年做過百貨公司售貨員，負責賣香水。五十年代佢諗住去考演員，點知報名人數爆曬棚，於是轉去考麗的電視台，搖身一變成為香港第一代新聞之花。做新聞之花期間，佢開始拍電視劇，可以話係周身刀張張利。報道話佢六十年代仲做過麗的電視藝員訓練班導師，學生包括依家嘅著名藝人汪明荃。

梁舜燕之後去過唔同電視台拍劇，大家比較熟悉嘅作品包括《刑事偵緝檔案》、《溏心風暴之家好月圓》、《肥田囍事》、《怒火街頭》等，當中大家好深刻嘅《真情》，可以話係佢嘅代表作。喺《真情》入面，梁舜燕個角色叫梁尚燕，有「上等人」嘅稱號，角色刻薄計較，梁舜燕將嘅角色演得入形入格。一位演出過咁多深刻角色嘅演員離世，絕對係大家嘅損失。

原圖為梁舜燕當年播新聞。