尋日講開赤鱲角機場，今日不如講埋舊啟德機場嘅歷史喇。阿史前排都提過，啟德機場係响1936年3月24日開始提供民航服務，當時第一班航班就係由英國帝國航空公司提供，來往香港同檳城嘅航班。之後其他航空公司亦陸續提供其他航線，包括：中國航空公司1936年提供由上海經廣州來往香港、泛美航空公司1937年提供三藩市來往香港、歐亞航空公司提供北京來往香港、法國航空公司1938年提供由巴黎經河內來往香港等等。不過到咗二戰期間，啟德機場就曾經受到破壞，連九龍寨城都受到波及。

喺1941年12月8日，日軍開始進攻香港，啟德機場成為空襲目標。因為日軍計劃佔領香港之後使用啟德機場，所以空襲大多都係「點到即止」，只係炸毀大部分嘅英國軍機同民航機，而機場就未有受到嚴重破壞。但駐港英軍總司令莫德庇少將就下令守軍撤退前破壞設施，令日軍佔領香港後用唔到啟德機場嘅機庫，甚至連飛機升降都有問題。

到咗1942年，日軍諗住擴建啟德機場，以便大型飛機升降。為達到目的，日軍將附近2萬名居民迫遷，又動用被俘虜嘅英軍同加拿大士兵，以及貧民苦力湊數，工人人數由最初800人增加至後來嘅4000人，可以話係勞師動眾。而最誇張嘅係，喺呢次擴建入面，日軍拆咗附近九龍寨城嘅城牆嚟做跑道同起明渠。由此可見，啟德機場絕對係香港歷史嘅「見證者」之一。

圖片為啟德機場舊照，取自網絡。