前排喺內地登台遇襲受傷嘅任達華，曾經拍過改編自「雨夜屠夫」林過雲案件嘅電影《羔羊醫生》，飾演主角林過雨。真實嘅「雨夜屠夫」林過雲相信大家都聽過佢個名，佢本身係一名的士司機，喺1982年2月至7月期間，响雨夜謀殺並且肢解4位女乘客，搞到人心惶惶。林過雲最終响8月落網，而破案嘅過程，可以話係相當曲折離奇。

林過雲先後殺死咗4位女乘客，行兇之後，林過雲仲會將佢哋肢解，並且錄影過程。當局最初收到喺荒野發現殘肢嘅報告，雖然出動大量警力調查，但都係毫無頭緒。直至有第4位女乘客遇害之後，有曬相公司職員覺得其中一名客人嘅相片非常可疑並報警，警方先至拉到林過雲。

據稱，原本林過雲係搵一個相熟嘅曬相公司職員幫佢曬相，聲稱自己係殮房兼職攝影師，所以一直無被揭發。直至最後一次因為機件故障，相片轉交其他分店沖曬，而令佢嘅惡行曝光。警方之後上到去林過雲屋企，搵到高踭鞋、器官標本同肢解過程嘅錄影帶等等。林過雲案件喺翌年3月開審，佢最終罪成，被判終身監禁。

當年參與調查、睇過林過雲錄影解剖過程嘅法醫馬宣立，認為林過雲唔當死者係人。馬宣立又提到，喺其中一張相入面林過雲用手摸遺體，相中隻手嘅指紋，就成為破案其中一個關鍵證據。

原圖取自網絡。