香港地少人多,交通網絡真係好重要,例如紅磡隧道咁之前被堵塞,就令嗰邊嘅交通非常擠塞。作為香港重要交通樞紐,紅隧梗係有返咁上下歷史,阿史今次分享嘅呢張相,係紅隧1972年通車之後嘅相。

紅隧係香港首條來往九龍同香港島嘅過海行隧道,喺1969年9月1日動工,1972年8月2日通車,當日「肥姐」沈殿霞坐老爺車率先通過,成為第一位使用紅隧嘅市民。紅隧全長1.86公里,耗資3.2億港元興建,但通車10年之後隧道行車流量飽和,幾乎每日繁忙時間往港島方向都塞車。政府於是喺1986年興建東區海底隧道分流車輛,減輕紅隧壓力,但紅隧至今仍然係香港最繁忙嘅隧道。