早兩日,長和系資深顧問李嘉誠,以「一個香港市民」嘅身份喺多份報章上登廣告,其中一版登咗句「黃台之瓜,何堪再摘」,惹嚟唔少人討論。其實呢句係出自唐高宗個仔李賢嘅《黃台瓜辭》,內容主要係勸母后武則天唔好對自己嘅親生骨肉趕盡殺絕。

話說武則天嘅長子李弘聰明仁孝,被唐高宗立為太子,但武則天覺得李弘會阻住自己稱帝,於是出手逼害自己個仔,搞到李弘英年早逝。之後次子李賢做咗太子,都避唔過武則天嘅毒手,呢首《黃台瓜辭》就係李賢入獄後寫嘅:「種瓜黃台下,瓜熟子離離。一摘使瓜好,再摘令瓜稀。三摘尚自可,摘絕抱蔓歸。」李賢以「黃台之瓜」嚟比喻武則天嘅四個仔,不宜一摘再摘,到頭嚟咩都無得剩。

不過,將軍澳香島中學校長鄧飛就指出,《黃台瓜辭》嘅出處並非源於唐朝史書入面關於李賢或武則天嘅記錄,而係嚟自一百年後嘅唐肅宗兒子李倓嘅傳記,仲係出自宰相李泌之口。所以,《黃台瓜辭》究竟係唔係出自李賢之手,又係唔係勸緊武則天?真係有待考究。

圖為武則天劇照,取自網絡。