阿史有時見到啲親戚退咗休之後周圍去旅行，不知幾羨慕。其實而家去旅行已經比以前方便得多，舊時要去旅行絕對唔簡單，環遊世界更加係大挑戰，不過英國著名劇作家蕭伯納就做到喇，佢喺1932年就同太太環遊世界，去過歐洲、亞洲同美洲多國添，成個旅程歷時128日，期間仲嚟過香港幾日添。

蕭伯納同太太喺1933年2月11日乘搭不列顛皇后號嚟到香港，同日香港各大報章嘅記者就急不及待上船搵蕭伯納做訪問，問佢對中日問題、國際裁軍會議等等國際政治事件嘅睇法。蕭伯納當時將1932年發生嘅滿州國事件，歸咎於日本背信棄義、國際聯盟「空有其表」，又話各國派代表參與國際裁軍會議，只不過係為咗刺探對手實力，最終只會徒勞無功。往後嘅發展，亦證明蕭伯納嘅眼光一啲都唔差！

蕭伯納夫婦一共留咗喺香港5日4夜，期間搭過山頂纜車上太平山睇維港景色，佢又到訪香港大學，出席歡迎茶會，出席人士包括香港政商界名人羅文錦、曹善允、郭少鎏等，以及數百位港大師生。原先蕭伯納無諗住喺港大演講，但最終喺師生嘅熱烈鼓掌下企咗出嚟，佢鼓勵大學生勇於同教授討論，建立獨立思考，唔好怕失敗，堅持信念。

喺2月14日，蕭伯納同太太應富商何東邀請去西摩道紅行出席私人午宴，之後何東就同蕭伯納去淺水灣一遊，二人談笑風生，暢談國際大事。到咗下晝5點，何東等人就送蕭伯納夫婦去皇后碼頭搭駁船返不列顛皇后號，兩人第二朝早離開香港，前往上海繼續環遊世界。

圖片為蕭伯納喺太平山睇維港照色、蕭伯納伉儷同何東伉儷合照，取自網絡。