早兩日將軍澳發生斬人案,令人震驚。案發嘅行人隧道將景林邨同厚德邨連接起嚟,其實呢兩條邨分別响1990年同1993年落成,係將軍澳發展新市鎮較早階段落成嘅屋邨。至於將軍澳嘅歷史,可以追溯至13世紀,當時已經開始有人居住,但去到16世紀後期先至逐漸多人聚居,形成多條細小漁村。「將軍澳」呢個名早於明代《粵大記》出現,相傳係因為明朝曾經有一位負責打擊走私嘅大將軍喺呢個海灣殉難,於是村民就將呢度命名為「將軍澳」,悼念呢位將軍。將軍澳以前亦有另一個英文名,叫「Junk Bay」。

幾百年來,將軍澳一直都係鄉郊地方,直到1960年代將軍澳造船業、修船業、鑄造業等工業活動蓬勃發展。喺1982年,政府批准喺將軍澳發展新市鎮,成為香港第7個新市鎮。

現時,將軍澳新市鎮總發展面積1,718公頃,大部分土地由填海得嚟,有大約40萬人居住。將軍澳可分為8個區域,包括寶琳、翠林、坑口、將軍澳市中心、調景嶺、小赤沙、大赤沙同百勝角,當最早發展嘅係翠林一帶,其次就係寶琳同南面景林邨一帶。將軍澳現時係以住宅區為主,公屋、居屋同私人屋苑都有,亦有唔少商場方便居民購物,到咗2002年8月港鐵將軍澳綫北角至寶琳段通車,令居民出入更方便。

不過多年來將軍澳嘅居民一直受到區內堆填區嘅臭味困擾,每日經過嘅貨車同垃圾車傳出陣陣惡臭,唔少居民嘅生活受影響。將軍澳第一個堆填區喺1978年啟用、1995關閉,將軍澳第二/三期堆填區就喺1988年啟用、1994年關閉。而家影響居民嘅堆填區就係位於將軍澳大赤沙嘅新界東南堆填區,喺1994啟用,直至2016年開始只收建築廢物。

圖片為1977年將軍澳,取自網絡。