宜家我哋睇嘅報紙、書，文字排版上大多數已經採用橫排嚟排版，但喺1955年之前，內地嘅報紙文字都係用豎排印製。不過原嚟改用橫排都關學者郭沫若事？

早响1954年嘅時候，喺《光明日報》嘅「文字改革」專欄裡面，已經有唔少讀者提議將報刊文字轉成橫排。喺1955年1月1號，《光明日報》等比較知名嘅報紙率先改版，由原本嘅豎排變橫排，反應不俗。隨後，著名學者郭沫若、胡愈之等亦撰文支持文字橫排，並指出橫排有其科學根據。因為人嘅兩隻眼係打橫生嘅，橫住睇嘅視線比打直睇要闊得多，而睇字嘅時候眼同頭嘅轉動比較少，閱讀自然慳力好多。加上外國嘅人名、地名同各種數理化公式用橫排亦比較方便，仲可以提高紙張使用率添。 

不過，其實早於二十世紀初，文字橫排已有先例，佢就係提倡拼音文字改革嘅劉世恩所寫嘅《音韻記號》一書。

圖為1955年1月1號嘅《光明日報》同郭沫若照片，原圖嚟自網絡。