今日係有「改革開放總設計師」之稱嘅鄧小平誕辰115週年，鄧小平經歷「三落三起」，喺1977年重返政壇，翌年中共十一屆三中全會確認佢嘅領導地位。當年喺鄧小平嘅領導下，中國透過同英國談判收回香港，落實一國兩制。喺1979年3月，英國租借新界嘅租約仲有18年就到期，於是時任港督麥理浩到北京會晤中共高層討論呢個問題，獲鄧小平接見。麥理浩提出1997年之後繼續俾英國繼續管治香港，被鄧小平一口拒絕，講咗句「香港是中國的一部分，這個問題本身不能討論」，而呢一句話亦成為鄧小平嘅其中一句經典語錄。

鄧小平仲有唔少金句，好似「發展才是硬道理」咁，就係同改革開放嘅歷史有關。喺1992年鄧小平南巡去到順德，參觀咗一間現代化嘅雪櫃廠，當佢知道間廠生產嘅雪櫃遠銷海外，佢就好開心咁講咗句「發展才是硬道理」。自此呢句就成為改革開放一句非常深刻嘅金句喇。

圖片為鄧小平當年會見麥理浩，取自網絡。