古時候身陷冤獄，點樣甩身？等武周名相狄仁傑完美示範過大家知。話說喺長壽元年（692年），酷吏來俊臣誣告宰相狄仁傑、副宰相任知古、吏部尚書裴行本等7人謀反。根據當時嘅律例，一問就承認謀反，可以免死，於是狄仁傑喺審問嘅時候，就話自己係唐朝舊臣，承認參與謀反，隨即被收監，鋃鐺入獄。點解明明無做過都認？呢招原來係佢自證清白嘅第一步。

喺收監期間，狄仁傑撕爛張被，咬手指用血寫自己嘅冤情喺塊布上面，佢再將封「血書」收喺棉襖入面，之後同獄卒講天氣炎熱，希望將棉襖拎返屋企，幫佢將入面嘅棉花拎走。獄卒信到十足，就將棉襖送去狄仁傑屋企。

結果狄家人搵到封「血書」，就向武則天申冤，武則天於是召見狄仁杰，問佢點解無謀反但又認罪，狄仁傑就話如果佢唔承罪嘅話，一早就被虐待至死。武則天最後釋放狄仁傑等人，狄仁傑雖然被貶做地方官，但總算保得住條命仔。

圖片為狄仁傑畫像、《狄仁傑之通天帝國》劇照，取自網絡。