9年前今日,去菲律賓馬尼拉玩嘅康泰旅行團團友响黎剎公園返上架旅遊巴,突然槍手門多薩衝咗上去,並挾持人質同旅遊巴。當晚香港電視台現場直播,大家都好憂心咁留意住情況,希望菲律賓盡快救出人質。但點知後嚟門多薩同警方談判破裂,發狂向人質開槍,菲律賓特種武器同戰術部隊決定強攻旅遊巴,進攻咗超過1小時之後先至擊斃槍手,慘劇中有8名香港人質死亡、7人受傷。慘劇發生之後,菲律賓當局被指反應過慢導致拯救失敗,當時嘅總統阿基諾三世喺接受訪問嘅時候仲「笑騎騎」,聲稱「我笑代表我憤怒」,並拒絕道歉,令香港同菲律賓關係轉差,當年香港一度對菲律賓發出黑色旅遊警示。

喺慘劇中遇害嘅領隊謝廷駿於出事時非常冷靜、勇敢,喺門多薩挾持旅遊巴之後無幾耐,靜靜雞打俾香港康泰旅行社報告事件,但最後俾槍手發現,佢冷靜咁交出電話,化解咗一次危機。其後又趁門多薩情緒穩定嘅時候,勸對方釋放部分老弱婦孺同埋女導遊。但不幸嘅係,門多薩同警方對峙到夜晚7點幾,得悉自己細佬被押走,於是開始向人質開槍,謝廷駿成為第一位遇害嘅人質。

另外有兩名香港遊客梁錦榮、傅卓仁喺門多薩向謝廷駿開槍之後,奮不顧身衝向門多薩,試圖制止佢,但最終失敗,遭射殺身亡。喺2011年,謝廷駿、梁錦榮同傅卓仁三人獲追授金英勇勳章,表揚佢哋英勇嘅行為。

原圖取自網絡。