農曆七月未過，今次就講講香港嘅經典恐怖電影題材——殭屍片。喺1985年，香港上映咗一套以殭屍為題嘅港產片《殭屍先生》，戲入面加入咗啲搞笑元素，令觀眾非常受落，當年香港嘅總票房高達2000萬港元，排第7，並且掀起咗一股殭屍熱潮。

喺《殭屍先生》入面，由演員林正英飾演茅山師父九叔，佢有兩位徒弟，分別係由錢小豪飾演嘅秋生，以及由許冠英飾演嘅文才。套戲就講述九叔受託，為一位富貴人家任老爺嘅爸爸起棺遷葬，但點知發現任老爺嘅爸爸變成殭屍，之後仲咬死咗任老爺，變咗「殭屍父子」。殭屍接二連三殺人，於是九叔同兩位徒弟，就合力將殭屍消滅。

呢套戲結合咗民間嘅鬼神傳說，以及武打、搞笑元素，造就咗呢套港產殭屍片經典，而林正英亦憑住呢套戲成為經典道士演員，並且獲提名第5屆香港電影金像獎最佳男配角。

圖為劇照，取自網絡。