呢張係喺1863年7月（農曆6月）發出嘅「夜間通行證」，俗稱「燈紙」。咁佢到底有咩用？話說喺1840年代初，香港海盜猖獗、治安唔好，港英政府就實施宵禁，華人夜晚11點到凌晨5點唔可以出門，哨兵或者軍警嗰段時間見到有人响街，又懷疑佢圖謀不軌、拒絕回答問題等，就有權開槍射殺。不過當時嘅罪案並無因宵禁而減少，1843年仲有海盜闖入政府大樓同英商倉庫打劫，擺明剃政府同大商家眼眉，搞到政府要再諗計仔。

同年5月，政府規定華人夜晚8點後出街要帶燈籠，確保其他人可以見到佢，否則就會被當成壞人，隨時可能被捕。到咗10點華人就禁止外出，除非得到香港總差役官簽發嘅「燈紙」，先至可以豁免。如果有人無燈紙，被會面臨罰款、拘禁同埋鞭笞，逃避截查更加會被槍擊。

不過之後香港治安都係未有明顯改善，港英政府喺1857年同1871年分別將宵禁時間提早至夜晚8點同7點。而宵禁最終實行咗55年，去到1897年先至被解除。

圖片嚟自網絡。